Sám 172

Handritið geymir Inntak sögubrotsins af Víga-Styr (Breviarium deperditi illius Fragmenti Membranacei Historiæ Styrianæ), það er að segja fyrri hluta Heiðarvíga sögu í endursögn Jóns Ólafssonar úr Grunnavík (1705-1779). Heiðarvíga saga varðveittist einungis á einni skinnbók sem lenti til Svíþjóðar seint á sautjándu öld og er nú varðveitt í Konunglega bókasafninu í Stokkhólmi. Árni Magnússon óskaði eftir því að fá handritið að láni, svo hann gæti látið skrifa upp söguna, og Svíar sendu...
More Description

Handritið geymir Inntak sögubrotsins af Víga-Styr (Breviarium deperditi illius Fragmenti Membranacei Historiæ Styrianæ), það er að segja fyrri hluta Heiðarvíga sögu í endursögn Jóns Ólafssonar úr Grunnavík (1705-1779). Heiðarvíga saga varðveittist einungis á einni skinnbók sem lenti til Svíþjóðar seint á sautjándu öld og er nú varðveitt í Konunglega bókasafninu í Stokkhólmi. Árni Magnússon óskaði eftir því að fá handritið að láni, svo hann gæti látið skrifa upp söguna, og Svíar sendu honum 12 blöð en gáðu ekki að því að á þeim var einungis fyrri hluti sögunnar, afgangurinn varð eftir í Stokkhólmi. Jón Ólafsson, sem var í þjónustu Árna, skrifaði upp textann á blöðunum en bæði skinnblöðin og afrit Jóns tortímdust í brunanum mikla í Höfn 1728. Árið eftir skrifaði Jón sögubrotið upp eftir minni og það er sá texti sem er í SÁM 172. Á undan honum fer formáli Jóns (bls. 3-6) og á eftir fylgir annars vegar listi yfir fornyrði og sérstakt orðfæri í sögunni (bls. 137-146), hins vegar ritgerð eftir Jón með yfirskriftinni ,,Nokkrar líklegar tilgátur um mennina, tímann og staðinn sem Heiðarvígin snerta" (bls. 147-167).Handritið er 84 blöð og er að líkindum skrifað um 1800 eða á fyrsta hluta nítjándu aldar. Neðst á titilsíðu stendur nafnið Sigurður Stefánsson, að því er virðist með hendi skrifara. Þar virðist einkum geta verið um tvo menn að ræða: Sigurð Stefánsson (1744-98), biskup á Hólum, eða nafna hans (1793-1817), guðfræðistúdent í Kaupmannahöfn.